Jóhanna Ásdís Baldursdóttir og tunglfarinn Harrison Schmitt sem tók í fyrra við viðurkenningu frá Ólafi Ragnari Grímssyni, fyrrum forseta Íslands, fyrir vísindastörf sín á tunglinu.
Húsvíkingar fara mikinn í fjáröflun fyrir byggingu tunglferju og vísindasafns þessa dagana.
Árið 2019 verða 50 ár frá því að menn tóku sín fyrstu skref á tunglinu og ætla Húsvíkingar að minnast þess með afhjúpun tunglferju í fullri stærð og nýju vísindasafni fyrir börn sem verður viðbót við landkönnunarsafnið þar í bæ.
Tunglfararnir komu til æfinga í Þingeyjarsýslu árin 1965 og 1967 fyrir ferðir sínar upp á mánagrund. Er fjölskylda geimfarans Neil Armstrong meðal þeirra sem lagt hafa verkefninu lið en einnig hefur heyrst að aðstandendur verkefnisins séu komnir í samband við þekktan Hollywoodleikara sem kunni að leggja verkefninu lið. Safnið hefur auk þess verið heimsótt af fjölda geimfara og landkönnuða síðustu ár.
Aðstandendur þess hafa nú þegar tryggt 36 milljónir af um 100 milljónum sem þarf til byggingar tunglferjunnar og stækkunar safnsins.