Jónas R & Bandið eru að gera það gott á tónlistarstaðnum Rósenberg á Klapparstíg en uppselt er á tónleika á morgun og aukatónleikar verið boðaðir á laugardaginn.
Þetta verður að teljast frábær endurkoma eins litríkasta poppara síðustu aldar sem hefur snúið sér að fiðlusmíð eftir gifturíkan feril sem dagskrárstjóri Stöðvar 2 á árum áður auk annars.
Fyrir þá sem muna uppgang íslenskrar popptónlistar á sjöunda áratugnum var Jónas R jónsson einn þeirra tónlistarmanna sem sannarlega skráðu þá sögu. 5 Pence, Toxic, Flowers, Náttúra og Brimkló voru allt geysivinsælar hljómsveitir með Jónas í fararbroddi og lög eins og Glugginn og Slappaðu af með eftirminnilegustu lögum þess tíma.
Í fyrra, eða 40 árum síðar, steig Jónas aftur á sviðið á tvennum tónleikum á Café Rosenberg sem báðir seldust upp. Hann endurtekur nú leikinn með frábærum hópi tónlistarmanna undir stjórn góðvinar síns, Gunnars Þórðarsonar.
Jónas verður með fjölbreytta tónlistardagskrá, smá rokk, smá jass, smá soul en umfram allt góða tónlist og gott “feel”.
Hér má sjá uppáhaldslag Jónasar og um það segir hann:
“Strawberry Fields er frábært lag, alveg einstakt. Ég hef aldrei heyrt neitt fyrr eða síðar sem líkist þessu. Sándið alveg úník – æðislegt.”