Markús Örn Antonsson fyrrum útvarpsstjóri og borgarstjóri brá sér upp í Efstaleiti í dag að gefnu tilefni og segir:
—
Á þessum degi fyrir 30 árum var Útvarpshúsið vígt. Í morgun notaði ég tækifærið til að taka nokkrar myndir af þessu kennileiti sem er að hverfa á bak við fjölbýlishús, sem nú rísa á lóð þess. Eftirleiðis verður RÚV á baklóð í Efstaleiti.
Það hlýnar sjálfsagt mörgum um hjartarætur við að sjá skjaldarmerki Reykjavíkurborgar ofan við anddyrið hjá þessari stofnun allra landsmanna. En auðvitað þýðir ekkert að vera með svona væl. “Æ, þetta útvarpshús var bara barn síns tíma,” segja þeir sem nýlega hafa verið að finna upp hjólið í fjölmiðlunarbransanum og smella í góm.
En það má nefna það í leiðinni að þetta var afrakstur af áratugalangri baráttu útvarpsstarfsmanna sem unnu við mikið þröngbýli í leiguhúsnæði á Skúlagötunni. Í Efstaleitinu sköpuðust loks almennileg skilyrði í húsnæðismálum Ríkisútvarpsins eftir meira en 50 ára starf og aðstaða fyrir tækninýjungar í útvarpi og sjónvarpi varð til fyrirmyndar.
