Snæbjörn Arngrímsson bókaútgefandi hefur selt forlag sitt, Hr. Ferdinand, til danska útgáfurisans Politiken.
Snæbjörn hefur starfað sem útgefandi í Danmörku um árabil en hafði áður stofnað bókaútgáfuna Bjart hér á landi sem hann seldi þegar hann freistaði gæfunnar erlendis. Og gæfan snerist honum í hag eins og marka má af þessari frétt.
Það var ekki síst útgáfuréttur á bókum Dan Brown sem kom fótunum rækilega undir Snæbjörn og hefur nú skilað þessari risasölu því þegar Politiken kaupir eitthvað þá er það ekki fyrir smáaura.
Sjálfur segir Sæbjörn á þessum tímamótum:
“Þótt ótrúlegt megi virðast þá var ég í Chamonix í morgun klukkan sjö. Klukkan hálftólf að kveldi var ég staddur 1600 km norðar; í Espergærde. Ég er búinn að keyra í allan dag eftir hraðbrautum Frakklands, Sviss, Þýskalands (frá suðri til norðurs) og Danmerkur (frá Rødby til Espergærde). Þegar við keyrðum af stað í morgun héldum við þeim möguleika opnum að gista á miðri leið en bíllinn brunaði með okkur allt til endastöðvarinnar án erfiðleika.
Ég er sem sagt kominn heim og það eru breytingar í mínum högum. Nú er ég bæði síðhærður og atvinnulaus. Forlagið Hr. Ferdinand höfum við selt til Politiken.”