Frumlegar útvarpskonur.
Þetta eru Helena Aðalsteinsdóttir og Minne Kersten sem ætla að opna útvarpsstöð í Hrísey eftir nokkra daga og senda út í viku með litlum sendi sem dregur rétt um eyjuna alla.
Helena og Minne eru hluti af Laumulistasamsteypunni sem er breytilegur hópur sem kemur saman árlega í Hrísey og vinnur að uppákomu. Undanfarin tvö ár hefur samsteypan staðið annars vegar fyrir blautri sýningu í fiskvinnsluhúsi og hins vegar göngu- og gjörningaleiðangri um eyjuna með tónleikum, njósnurum og hvísli.
Í ár er Laumulistasamsteypan orðin að útvarpstöð og enginn veit hvað verður á dagsskrá. Tólf tón- og myndlistarmenn munu leggja saman lendar sínar og miðla mögulega hljóðverkum, óhljóðum, búkhljóðum, töluðu máli, morgunstundum og bollaleggingum. Samsteypan mun hljóðvarpa í Hrísey, dagana 10.-16. ágúst, á tíðninni 105,9 en einnig verður hægt að hlusta á Laumulistasamsteypuna áheimasíðu hennar á Netinu.
Augljóst útvarp, uppskeruhátíð samsteypunnar, verður 16. ágúst og þá eru allir velkomnir í eyjuna að útvarpa með okkur. Dans, gleði og veigar frá Kalda á Árskógssandi. Nóg er af tjaldstæðum og ávalt heitt á könnunni.
Kíkið við!