Úr bakherberginu:
—
Hver borgar 835 milljónir króna að ástæðulausu? Jú, það gerir tryggingafélagið VÍS.
Ekki er annað hægt að lesa út úr tilkynningu sem VÍS sendi til Kauphallarinnar. Þar segir að VÍS hafi komist að samkomulagi við lífeyrissjóðinn Lífsverk um að greiða “samkomulagsbætur” upp á 835 milljónir.
En VÍS tekur skýrt fram að þetta feli ekki í sér viðurkenningu á bótaskyldu eða röksemdum Lífsverks. Hvers konar bjánagangur er það? Ef tryggingafélagið viðurkennir ekki að því sé skylt að borga, hvers vegna er það þá að borga? Ef það fellst ekki á röksemdirnar fyrir því að borga, hvers vegna er það þá að borga?
Venjulegt fólk þekkir mætavel hversu erfiðlega getur gengið að fá greiddar bætur frá tryggingafélögum. Oft þarf að fá aðstoð lögfræðinga til þess, eða höfða dómsmál. Aldrei áður hefur heyrst að tryggingafélag borgi þrátt fyrir að hafa ekki viðurkennt bótaskylduna – hvað þá greiðslu upp á 835 milljónir.