Úr umhverfisdeildinni:
—
Í umræðunni um vandræðin með verksmiðju United Silicon í Keflavík hefur lítt verið rifjað upp að Ragnheiður Elín Árnadóttir fyrrum iðnaðarráðherra á allan heiðurinn af því að verksmiðjan tók þar til starfa. Óþarfi er að leyna því.
Sem ráðherra iðnaðarmála – og þingmaður Suðurnesja – beitt Ragnheiður Elín sér fyrir því af miklum krafti á árinu 2014 að veita United Silicon nauðsynlega fyrirgreiðslu úr ríkissjóði til að verksmiðjan næði að rísa. Fram að því hafði verkefnið verið í hálfgerðu tómarúmi.
Ragnheiður Elín sá til þess að United Silicon fékk margra ára lækkun á skattgreiðslum og að fjármunir skattgreiðenda voru settir í vegagerð og hafnaraðstöðu í Helguvík. Til að réttlæta þessa fyrirgreiðslu fullyrti ráðuneyti hennar að verkefnið hefði í för með sér “jákvæð þjóðhagsleg, samfélagsleg og efnahagsleg áhrif.” Ekki er víst að nágrönnum verksmiðjunnar finnist það sama, ekki akkúrat núna meðan illa undirbúin verksmiðjan spúir menguninni út í andrúmsloftið. En það gat Ragnheiður Elín auðvitað ekki séð fyrir, a.m.k. ekki með því að lesa umhverfismatsskýrslu verksmiðjunnar, sem stjórnendur verksmiðjunnar reyndar skrifuðu sjálfir.