Oft er talað (og gjarnan með vandlætingu) um eina prósentið í þjóðfélaginu, efnaðasta eina prósent íbúa landsins.
En í hinu efnaða eina prósenti eru ekki allir jafn efnaðir. Sumir eru jafnari en aðrir, svo vitnað sé í George Orwell.
Þeir efnuðustu í eina prósentinu halda sig gjarnan á toppnum, ekki bara efnahagslega heldur ekki síður búsetulega. Áður fyrr þurfti eina prósentið að byggja sér kastala uppi á hæð, en byggingatæknin hefur tekið framförum. Núna er það efsta hæðin, í Reykjavík jafnt sem New York. Penthouse íbúðir eru yfirleitt stærri og dýrari en aðrar. Þeir ríku vilja ekki hafa neinn fyrir ofan sig og lyftan upp er með lás.
Toppurinn á eina prósentinu á Íslandi býr því að sjálfsögðu í hæsta háhýsinu í stærstu íbúðunum með mesta útsýnið í fínasta hverfinu, Skuggahverfinu. Þetta eru einu íbúðirnar á höfuðborgarsvæðinu þar sem útsýni er óhindrað til norðurs, suðurs, austurs og vesturs. Hallgrímskirkja telst ekki íbúð.
Meðal þeirra sem tróna á eins prósents toppnum í Skuggahverfinu er Sigurður Gísli Pálmason athafnamaður, áður fyrr kenndur við Hagkaup. Íbúð hans er auðþekkjanleg á ljósastaur sem stendur úti á svölunum hjá honum. Ljósastaurinn er listaverk, en ekki settur þar að skipan gatnamálastjóra til að lýsa almúganum.
