Stríðsfréttaritari sendir skeyti:
—
Fáir virðast hafa áttað sig á því að blekkingarviðtal sænska sjónvarpsins við Sigmund Davíð Gunnlaugsson gæti flokkast sem árás á fullveldi Íslands. Hrein og klár stríðsyfirlýsing.
Útsendarar sænska sjónvarpsins SVT eru ríkisstarfsmenn. Sænska ríkið á SVT og lætur það fá fjármagn. Þessir sænsku ríkisstarfsmenn komu hingað til lands beinlínis í þeim tilgangi að blekkja íslenska forsætisráðherrann í þeim tilgangi að koma honum svo illa að hann þyrfti að segja af sér.
Formlega séð er þetta því íhlutun stjórnvalds erlends ríkis í ríkisstjórn Íslands. Markmið sænsku ríkisstofnunarinnar: að skapa þær aðstæður að forsætisráðherra Íslands þyrfti að segja af sér og helst öll ríkisstjórnin og jafnvel að boðað yrði til kosninga.
Skiptum um nöfn í þessu samhengi til að sjá stóru myndina. Allir vita að Pútín er gjörspilltur og allt hyskið í kringum hann. Segjum að BBC, sem er í eigu breska ríkisins, hefði komið Pútín í svipaða stöðu í sjónvarpsviðtali sem síðan yrði dreift um allt Rússland. Í viðtalinu kæmi Pútín svo illa út að Rússar myndu fylla Rauða Torgið og heimta afsögn hans með hávaða og látum. Heldur einhver eitt augnablik að það yrði litið á þetta öðru vísi en sem grófa íhlutun og árás á stjórnvöld í Rússlandi. Efast einhver um að herþotur yrðu sendar á loft og herskip send út á haf?
Í þessu samhengi skiptir engu máli hvort Sigmundur Davíð eða Pútín eigi þetta skilið því þeir séu hinir mestu þrjótar. Það að stofnun á fjárlögum í einu ríki standi vísvitandi að því að fella leiðtoga annars ríkis er einfaldlega grafalvarlegt.
Furðulegt er að utanríkisráðherra hafi ekki kallað sendiherra Svíþjóðar á sinn fund til að lesa yfir honum og reka svo úr landi.
Það hefur verið farið í stríð af minna tilefni.