Opinn fundur um rekstur hjúkrunarheimila verður haldinn í Menningarhúsinu Hofi á Akureyri í kvöld, þriðjudagskvöldið 27. september, kl. 20. Á fundinum verður leitast við að svara þeirri spurningu hvort sveitarfélögin geti og eigi að reka hjúkrunarheimili en ábyrgð á stofnanaþjónustu við aldraða er á höndum ríkisvaldsins.
Framsögu á fundinum hafa Guðmundur Baldvin Guðmundsson formaður bæjarráðs sem fjallar um rekstrarstöðu Öldrunarheimila Akureyrar, Karl Björnsson framkvæmdastjóri Sambands íslenskra sveitarfélaga talar um stöðu sveitarfélaga sem reka hjúkrunarheimili og nýtt rammasamkomulag um rekstur hjúkrunarheimila, og loks mun Kristján Þór Júlíusson, heilbrigðisráðherra, reifa málið frá sjónarhóli ríkisins. Að loknum framsögum verður opið fyrir almennar umræður og fyrirspurnir. Fundarstjóri verður Þórgnýr Dýrfjörð framkvæmdastjóri Akureyrarstofu.