Fjármálaráðherra lýsti því yfir í Ríkissjónvarpinu í gærkvöldi að hann vildi banna krónuna til notkunar í launagreiðslum sem lið í baráttunni gegn svartri atvinnustarfsemi.
Fjármálamaðurinn Ragnar Önundarson, sá sem fyrstur og hvað mest varaði við yfirvofandi hruni bankakerfisins, gerir athugasemdir við:
“Það er mjög virðingarvert að fjármálaráðherra skuli vilja taka ,,svarta hagkerfið” föstum tökum. Ferðabransinn er gróðrarstía skatt- og lífeyrissvika, svo ætla má að vandinn fari vaxandi.
Með lífeyrissvikum á ég við að þeir sem svíkja undan skatti borga ekki heldur í lífeyrissjóð. Þeir taka sér ,,frítt far” í mennta- og heilbrigðiskerfi gegnum lífið og bæta svo gráu ofan á svart með því að eiga ekki fyrir framfærslu sinni í ellinni, láta okkur hin borga hana líka. Ég hef lagt til að byrjað verði á að senda öllu vinnandi fólki yfirlit árlega um hvaða fjárhæð það eigi í lífeyrissjóði og bera saman við þá fjárhæð sem það þurfi að eiga m.v. aldur til að framfleyta sér í ellinni. Síðar mætti binda í lög að svonefnt ,,lögveð” skuli hvíla á skráðum eignum fólk til að tryggja að neikvæðum mismun í þessum efnum verði mætt.
Krónan er hins vegar ,,lögeyrir” landsins og því vandséð að unnt sé að ,,banna” notkun hennar.”