Snorri Ásmundsson myndlistarmaður opnar sýningu á verkum sínum í Gallery O við höfuðstöðvar Orange Project / Regus í Ármúla 4-6 miðvikudaginn 15. mars klukkan 17.
Snorri hefur oft verið kallaður óþekka barnið í Íslenskri myndlist og hefur hreyft við samfélaginu til nokkurra ára með fjölbreyttum og eftirtektarverðum sýningum, þar sem hann vinnur með samfélagsleg „tabú“ eins og pólitík og trúarbrögð. Hann hefur fyrst og fremst reynt að ögra félagslegum gildum með gjörningum sínum. Hann leitar sterkra viðbragða og skoðar tamkmörk náungans og sín eigin.
“Þegar ég er kynntur fyrir fólki á ferðalögum mínum er ég oft spurður hvernig list ég geri. Ég hika oft með svar því ég nota marga miðla og það er stundum sagt við mig að ég sé listaverkið sjálfur, að ég sé Sósíal skúlptúr. Ég skil meininguna mæta vel því mörg verka minna eru speglun eða framlenging á þankagangi mínum og vangaveltum og ég er mjög sjáanlegur þegar ég tek mig til. Málverkið hefur alltaf haft stóran sess í minni sköpun og fyrsta opinbera myndlistarsýningin mín í jùlí 1996 var málverkasýning. Þótt ég sé kunnastur fyrir gjörninga mína er það málverkið sem er ódauðlegt og það brauðfæðir mig og það er æðisleg tilfinning að vera besti málari á Íslandi og í hópi fimm bestu málara í heiminum í dag.“