Pósturinn hefur ekki undan að bera út fréttaskot um Davíð Oddsson og hér er eitt:
Nágrannar Davíðs Oddssonar, núverandi forsetaframbjóðanda, hafa veitt því athygli að undanförnu að hann stendur gjarnan úti í garði í húsi sínu í Fáfnisnesi 12 og fóðrar máva sem koma aðvífandi. Suðurhliðin snýr að Skeljatanga og fólk þar og í Bauganesi hefur tekið eftir þessu. Hann hefur kannski verið að sækja sér hugmyndir að skrifum í Staksteinum eða Reykjavíkurbréfi með því að blanda geði við mávana því erilllinnn er kannski oft á tíðum of mikill í Hádegismóum og mávagargið og flögrið í þeim við Skeljatanga andríkara en við skrifborðið þar efra.
Og svo annað:
Það vakti athygli þegar Davíð Oddsson kynnti framboð sitt til forseta að hann valdi “Baugsmiðil” til að gera það . Sem kunnugt er þá er þátturinn Sprengisandur á Bylgjunni nú undir stjórn Páls Magnússonar fyrrverandi útvarpsstjóra og á sínum tíma sparaði Davíð ekki skot sín á svokallaða “Baugsmiðla” og fréttaflutning Ríkisútvarpsins þegar Páll var þar og hét. Menn í bransanum minnast lika stöðugra árása hans á fréttastofu RÚV þegar Óðinn Jónsson réð þar ríkjum en gleyma því jafnframt stundum að eitt eftirminnilegasta viðtal sem nokkur hefur átt við Davið var einmitt þegar Davíð greindi frá því að fulltrúar Baugsmanna ætluðu að múta honum. Kannski Davíð mæti eftir allt saman í viðtal hjá Óðni á Morgunvaktinni.