Á sameiginlegum fundi stjórnarandstöðunnar í síðustu viku með stjórnarskrárfélaginu, sem er áhugafélag um nýja stjórnarskrá, talaði bandarískur prófessur um þá lýðræðislegu fyrirmynd sem hann taldi vera fólgna í því framtaki íslenskra stjórnvalda eftir hrun að efna til kosninga til stjórnlagaþings þar sem valdir yrðu fulltrúar til að skrifa nýja stjórnarskrá. Ýmislegt kom fram á þessum fundi þar sem fulltrúar stjórnmálaflokka mættu, Birgitta Jónsdóttir frá Pírötum, Valgerður Bjarnadóttir frá Samfylkingu, Teódóra Þorsteinsdóttir frá Bjartri framtíð (sem viðurkenndi að hún þekkti lítið til þessa málaflokks) og Katrín Jakobsdóttir frá VG.
Ýmsir stóðu upp á fundinum þ.á m. Þorvaldur Gylfason einn höfunda stjórnarskrárdraganna sem stjórnlagaráð vann eftir að hæstiréttur ógilti kjör stjórnlagaþings og ríkisstjórnin ákvað að skipa fulltrúa í nýtt stjórnlagaráð úr sama hópi og Hæstiréttur hafði ógilt.
Á fundinum stóð einnig upp Guðmundur Ragnar (sjá myndband á 27. mínútu) sem lýsti því yfir að umræður allar hverfðust um framtak þingsins en ekki það frumkvæði sem hefði löngu verið komið til sögunnar í grasrótinni áður en pólitíkusar gripu inn í og gerðu málið að sínu þannig að þeir gætu stjórnað framvindunni.
Sagði Guðmundur Ragnar að mun meiri stuðningur myndi vera til staðar varðandi nýja stjórnarskrá ef frumkvæðið hefði ekki verið tekið af fólkinu og sniðið að þörfum pólitíkusa.
Á meðfylgjandi mynd má sjá Guðmund Ragnar (á bak við rauða tunnu) ásamt tveimur fyrrverandi stjórnlagaráðsmönnum, Illuga Jökulssyni og Vilhjálmi Þorsteinssyni. Þeir berja þarna á trommur í kjölfar uppljóstrana í Panamaskjölum sl vor áður en uppvíst varð að Vilhjálmur var sjálfur eigandi mikils fjár í skattaskjólum.