Afmælisbarnið og eiginkonan.
Frá fréttaritara okkar í samkvæmislífinu:
—
Sagt er að 2007 sé komið aftur og nú á sterum.
Skemmtilegasti dúett landsins er án efa Eurobandið en það skipa hin ofurhressu Friðrik Ómar og Regína Ósk. Eurovisionlag þeirra, Fullkomið líf eða This is my life, var eitt fjölmargra laga sem ómaði í einu trylltasta fimmtugasafmæli sem haldið hefur verið síðustu ár í Reykjavík.
Marinó Guðmundsson, nú stjórnandi í Arionbanka og bónusgreiðsluþegi (sjá frétt hér), hélt upp á fimmtugasfmæli sitt með 2007 stæl í Gamla bíó nú á laugardaginn. Marinó sem var eitt sinn forstjóri 66 N er vinamargur og var gestalistinn langur og á honum voru helstu fjárfestar og forkólfar í íslensku atvinnulífi í dag. Einungis var boðið upp á það besta. Dýr vín, dúkuð borð og eðalsnittur, nóg handa öllum.
Marinó og kona hans, Guðrún Gerður, voru sólbrún og sæt þegar að þau tóku á móti gestum sínum enda nýkomin frá Spáni þar sem að þau spiluðu golf í góðra vina hópi.
Skemmtiatriðin voru ekki af verri endandum, auk Eurobandsins léku þeir Hrafnkell og Jónsi úr Svörtum fötum fyrir gesti, og rúsínan í pylsuendanum voru einkatónleikar hljómsveitarinnar Nýdönsk ásamt söngvaranum Daníel Ágúst.
Stuðið hélt áfram fram á rauða nótt.